• Húfuverkefnið snýst um að prjóna húfur og afhenda þær öllum börnum sem fæðast á Íslandi árið 2010. Áætlað er að um 5000 húfur þurfi í verkefnið en gert er ráð fyrir að um 5000 börn fæðist á landinu afmælisárið.
  
•  Kvenfélagasamband Íslands í samvinnu við Ljósmæðrafélag Íslands og kvenfélögin í landinu standa að verkefninu.
•  Kvenfélagasamband Íslands dreifir verkefnislýsingu og uppskrift að litlum húfum sem passa á nýbura ásamt merkimiðum til að merkja húfurnar. Ístex leggur til merkimiðana, á þeim eru upplýsingar um verkefnið og leiðbeiningar um meðhöndlun húfunnar sem prjónuð er úr Kambgarni.
•  Kvenfélagskonur prjóna húfurnar og skrá nafn sitt og kvenfélag á merkimiða sem fylgir hverri húfu.
• Hvert kvenfélag skipar húfumeistara sem hefur umsjón með verkefninu í sínu félagi. Felst það  m.a. í því að taka á móti húfunum, sjá um að þær séu merktar og koma þeim til formanna eða húfumeistara héraðssambandanna.
  
• Húfumeistarar eða formenn héraðssambandanna taka á móti húfum og eru tengiliðir við húfumeistara KÍ sem sjá um að fjöldi móttekinna húfa og áætlaður fjöldi fæðinga fari saman. Þær skipuleggja einnig dreifingu á húfunum til ljósmæðra á fæðingardeildum um allt land.
• Ljósmæður afhenda foreldrum nýburanna húfurnar við útskrift af fæðingardeildum og í heimahúsum þar sem fæðingar verða.
  
• Konum utan kvenfélaganna er velkomið að leggja verkefninu lið og má hvort sem er merkja þær húfur Kvenfélagasambandi Íslands, héraðssambandi eða kvenfélagi á viðkomandi svæði, sem og prjónakonunni.

Kvenfélagasamband Íslands vonast er eftir almennri þátttöku um þetta góða verkefni sem er  tvíþætt. Annars vegar snýst það um að láta gott af sér leiða og gefa öllum börnum handprjónaða  húfu og hins vegar um að vekja athygli á kvenfélögunum í landinu og starfssemi þeirra.
Kvenfélagasamband Íslands dreifir uppskrift að litlum húfum sem passa á nýbura og merkimiðum með upplýsingum um verkefnið og leiðbeiningum um meðhöndlun húfunnar.

Uppskrift af KÍ húfunni

Stærð:   0-3 mánaða
Efni:      Kambgarn frá Ístex
Prjónar: Sokkaprjónar og 40 cm hringprjónn nr. 3
Sjá má stóra og góða mynd af húfunni inn á myndasíðu okkar.

Húfan:

• Tengja í hring og prjóna 15 lykkjur sléttar
• taka 1 lykkju óprjónaða, prjóna 2 lykkjur sléttar saman, steypa óprjónuðu lykkjunni yfir þá prjónuðu,
• prjóna 15 lykkjur sléttar,
• slá upp á prjóninn, prjóna 1 lykkju slétta, slá upp á prjóninn,
• prjóna 15 lykkjur sléttar.
  
  Endurtaka:
• Taka 1 lykkju óprjónaða, prjóna 2 lykkjur sléttar saman, steypa óprjónuðu lykkjunni yfir þá prjónuðu,
• prjóna 15 lykkjur sléttar,
• slá upp á prjóninn, prjóna 1 lykkju slétta, slá upp á prjóninn,
• prjóna 15 lykkjur sléttar.
• Taka 1 lykkju óprjónaða, prjóna 2 lykkjur sléttar saman, steypa óprjónuðu lykkjunni yfir þá prjónuðu,    
• prjóna 15 lykkjur sléttar,
• slá uppá prjóninn, prjóna 1 lykkju slétta, slá upp á prjóninn (og þá er prjónuð 2. umferð) ef prjónað er á fjóra prjóna er auðveldast á flytja fyrstu lykkju yfir á  prjóninn, sem verið var að prjóna og prjóna hana slétt, til að auðvelda að prjóna úr uppsláttarbandinu í lok 2. umferðar.

• Prjóna 15 lykkjur séttar (ath. fyrsta lykkja í 3. umferð er síðasta uppsláttarbandið í 2. umferð),
• taka 1 lykkju óprjónaða, prjóna 2 lykkjur sléttar saman, steypa óprjónuðu lykkjunni yfir þá prjónuðu,
• prjóna 15 lykkjur sléttar,
• slá uppá prjóninn, prjóna 1 lykkju slétta, slá upp á prjóninn,
• prjóna 15 lykkjur sléttar.
  
  Endurtaka:
• Taka 1 lykkju óprjónaða, prjóna 2 lykkjur sléttar saman, steypa óprjónuðu lykkjunni yfir þá prjónuðu,
• prjóna 15 lykkjur sléttar,
• slá upp á prjóninn, prjóna 1 lykkju slétta, slá uppá prjóninn, prjóna 1 lykkju slétt, farið eins að og lýst er í lok 1. umferðar.

• Eftir 4 umferðir færirðu síðustu lykkju yfir á fyrsta prjón, alltaf í munstur pr. Endurtaka þriðju og fjórðu umferð 10 sinnum í viðbót, alls 12 útaukningar og 12 úrtökur, samtals 24 umferðir.
• Úrtaka í kollinn.
• Nú er hætt að auka út (ekki er lengur slegið uppá prjóninn) haldið áfram að taka úr eins og áður, en nú er það gert í hverri umferð þar til 12 lykkjur eru eftir.
• Prjóna 2 lykkjur saman út umferðina, þá eru 6 lykkjur eftir.
• Slíta bandið frá skilja eftir smá spotta,  þræða spottann gegnum lykkjurnar og ganga frá. Prjónað band í spíssin á hvorri hlið: Taka upp 3 lykkjur, prjóna slétt (alltaf frá sömu hlið) færa bandið aftur fyrir prjóninn og prjónið áfram ca 20 - 25 cm.